نظام اللودبيرنق load bearing :
لي نحن هنا في السودان لسة مصرين انو نبني غلط بنظام اللودبيرنق ؛ هل لانو الطريقة الغلط الاسة دي سهلة وغير متعبة للمقاول أو المهندس أم جاهلين بالطريقة الصحيحة التي نصت عليها اغلب الكودات BS8110 or AcI ..
يا المالك العايز تبني لودبيرنق والله الطريقة الشغالين ليك بيها دي والله غلط ما ممكن تخسر مليارات وبعد 5_ 7 سنة تقول بيتي اتشقق وتجي تنزل بوست انو عايز علاج للشقوق بشتي صورها .
انا شخصيا مالقيت الطريقة الببنو بيها اللودبيرنق هنا إلا في السودان.
ياخ بالمنطق كدة هل بمنطق توزيع الأحمال أحمل القريد بيم فوق الطوب المنطق بقول العكس؛ ما ممكن تحمل الاقوي فوق الأضعف .
يااخ اقول ليكم حاجة ؟!!
مافي حاجة إسمها استخدم حجر في الساس اطلاقا ( ياخ الحجر دا بدعة ).
الحجر دا استخدامو فقط في حالات خاصة. (لتحسين خواص التربة السعتها التحميلية ضعيفة؛ bearing Cabcityfor وليس استخدامه كأساس.
نحن بنعرف بس ردمية خرسانية علي طبقات ما تزيد عن 30 سم .
وبنعرف حاجة إسمها استريبس فاونديشن؛ غير كدة دا لعب ساي .
الملاحظة الأخيرة
لمن تجي تردم القصة ياخ ما تردم بأي تربة لانو بعدين بتجي تشكي من بلاطك اتقلع وبابك بقي ما بقفل
النصيحة الأخيرة
اخسر مررة واحد ولو بالغالي
ما تخسر بالرخيص وتجي تعدل
نصيحة للإخوة المهندسين والمقاولين:_
أعتبر البناء الشغالوا دا بيتك ؛واشتغل بالطريقة الصح وخاف ربك في شغلك.
لانو الشغل المتقن بجيب ليك شغل براه
اتمني اني اتوفقت في سرد ولو نقطة في بحر
مهندس مقاول / قتادة أحمد سيدأحمد
No comments:
Post a Comment